FILE PHOTO: Isang provincial bus ng isang transport company na may terminal sa EDSA-Cubao (RAYMOND BALA LACSA / Photoville International)

MANILA, Philippines — Nangangambang malugi ang ilang bus operator kapag binuksan na ang Integrated Provincial Bus Terminal sa Metro Manila sa susunod na buwan.

Ayon kay Alex Yague, ang pinuno ng Provincial Bus Operators Association of the Philippines (PBOAP), kailangan pa ng karagdagang dayalogo sa transport groups upang maging malinaw ito sa mga driver at pasahero na maaapektuhan ng plano.

“Ang kailangan natin dyan ay more dialogue sa mga operator, kasama yung mga mananakay para maintindihan natin kung anong dapat gawin, para maimplement natin ng mahusay walang gulo at maayos.”

Ang naturang proyekto ay hakbang ng pamahalaan upang i-relocate ang provincial bus terminals papalabas ng Metro Manila para mabawasan ang bulto ng mga bus na bumabaybay sa kahabaan ng EDSA.

Kapag naitayo na ang iba pang integrated bus terminal, wala nang pahihintulutang provincial bus company na magkaroon ng terminal sa iba’t ibang bahagi ng Metro Manila.

Target ng Metropolitan Manila Development Authority (MMDA) na maging operational ang integrated bus terminal sa south area ng Metro Manila ngayong darating na Hulyo. (Jerico Albano & Ruth Navales, UNTV News)

LRT Roosevelt Station (CONTRIBUTED PHOTO)

MANILA, Philippines – Pinag-aaralan na ngayon ng Light Rail Transit Authority (LRTA) ang posibleng pagpapalawig ng kanilang operating hours sa panahon ng tag-ulan.

Ayon kay LRTA Spokesman Hernando Cabrera, kasunod ito ng epekto ng mga pagbaha sa Metro Manila dahilan para ma-stranded ang maraming pasahero partikular ang mga estudyante.

Sa kasalukuyan, ang huling biyahe LRT Line 1 na rutang Pasay-Quezon City ay alas-9:30 hanggang alas-10 ng gabi.

Gayunman, aminado ang opisyal na kailangan din nilang isaalang-alang ang kondisyon ng kanilang mga tren kapag itinuloy ang plano. (UNTV News)

FILE PHOTO: Pansamantala, ang mga bagong rehistrong mga sasakyan ay ginagamit muna ang mga nakasulat sa kanilang conduction sticker bilang temporary license plate. (RAYMOND BALA LACSA / Photoville International)

MANILA, Philippines – Maaari nang maglabas ng mga bagong plaka ng mga sasakyan ang Land Transportation Office (LTO) simula sa Agosto.

Ayon kay LTO Chief Virginia Torres, nakahanda na ang mga plaka ngunit naantala lamang ang paghahatid nito sa kanilang tanggapan.

Nilinaw ni Torres na pansamantala lamang ang ipinatutupad na ordinansa kung saan ginagamit ng mga bagong sasakyan ang conduction sticker bilang mga plaka nito.

Ang mga bagong plaka ay may barcode kung saan makikita ang plate number ng sasakyan, engine number, chassis number, serial number, number of plate locks at third plate sticker.

Para sa mga public utility vehicle, nakasaad na sa plate number ang ruta ng kanilang sasakyan.

Ang mga bagong plaka ay permanenteng ikakabit sa mga sasakyan sa pamamagitan ng one-way metal screw.

Ang isang plaka ay magkakahalaga ng mahigit isang daang piso para sa mga motorsiklo at mahigit apat na raang piso naman para sa mga kotse at iba pang uri ng motor vehicle.

Inaasahan na makakagawa at makakapag-isyu ng mahigit 5-milyong bagong plaka ang LTO sa mga motor vehicles at mahigit 9-milyon naman para sa mga motorsiklo.

Sa kabuoan, aabutin ito ng mahigit 3-bilyong piso kasama na ang supply at delivery ng mga plaka simula July 2013 hanggang June 2018. (Mon Jocson & Ruth Navales, UNTV News)

FILE: Ang Kansai International Airport sa Osaka na isa sa mga pinakaablang paliparan ng Japan kung saan lumalapag ang mga eroplanong lulan ang mga Pilipinong pumupunta sa naturang bansa. (PHOTO CREDITS: Carpkazu / Wikipedia)

TOKYO, Japan — Bibigyan ng multiple entry visa ng bansang Japan ang mga Pilipinong turista na nagnanais dumalaw sa bansa simula sa buwan ng Hulyo hanggang Agosto ngayong taon.

Mismong si Japan Prime Minister Shinzo Abe ang nagpahayag ng bagong patakaran upang lalong patatagin ang ekonomiya ng bansa sa pamamagitan ng pagpapalakas sa industriya ng turismo.

Inaasahang aabot sa 18-milyong turista ang dadagsa sa naturang bansa pagsapit ng 2016.

Kasunod nito, ikinatuwa naman ng embahada ng Pilipinas sa Japan ang bagong patakaran.

Ayon kay Philippine Consul General in Tokyo, Japan na si Joy Ignacio, malaking tulong ito sa maraming Pilipino partikular sa mga nagtatrabaho sa naturang bansa.

“Excited din po kami dito dahil ibig sabihin nito marami pong Filipino na makakapasok po ng Japan, ang pabalik-balik po di na sila mahihirapan makakuha ng visa.”

Sinabi pa ni Ignacio na magandang oportunidad ito upang higit na mapatatag ang magandang relasyon ng Pilipinas at Japan.

Inaasahan namang palalawigin pa ng bansang Japan ang pagbibigay ng temporary multiple entry visa sa mga Pilipino kahit tapos na ang summer vacatio. (Ana Monica-Padua & Ruth Navales, UNTV News)

FILE PHOTO: Mass Rail Transit (RAYMOND BALA LACSA / PHOTOVILLE International)

MANILA, Philippines — Magkakaloob ng libreng sakay ang Light Rail Transit (LRT) at Metro Rail Transit (MRT) sa mga Filipino seafarer sa Martes, June 25 bilang pakikiisa sa Filipino Seafarer’s Day.

Ang libreng sakay sa LRT Line 1 and 2 at MRT 3 ay mula alas-7 hanggang alas-9 ng umaga at alas-5 hanggang alas-7 ng gabi.

Nagpaalala naman ang Department of Transportation and Communications (DOTC) sa mga nais mag-avail ng free ride na iprisinta lamang ang kanilang seaman’s book o PRC I.D.

Taong 2011 nang lagdaan ni Pangulong Benigno Aquino III ang Proclamation 183 na nagdedeklara sa June 25 bilang Day of the Filipino seafarer.

Ito’y bilang pagkilala sa kontribusyon ng mga seaman sa pagpapaunlad ng bansa. (UNTV News)

FILE PHOTO: Isang pampasaherong bus na tumatahak sa kahabaan ng EDSA (RAYMOND BALA LACSA / Photoville International)

MANILA, Philippines — Maglalabas na ng regulasyon ang Land Transportation Franchising and Regulatory Board (LTFRB) kaugnay sapaglilimita sa lifespan ng mga pampasaherong bus sa bansa.

Sa panayam ng UNTV kay LTFRB Chairman Atty. Winston Ginez sa programang “Get It Straight with Daniel Razon” kaninang umaga, sinabi nito na hanggang 15 taon na lamang maaring gamitin sa pamamasada ang mga bus.

“Sa mga buses natin ngayon, ito ay hindi dapat lalagpas ng 15 taon mula sa kanilang date of manufacture.”

Dagdag pa ni Ginez, “ito po ay parang pagbabalanse na rin sa pakiusap ng mga bus companies para magkaroon sila ng sapat na panahon na pagrecover ng kanilang investment.”

Ang nasabing regulasyon ay bahagi ng programa ng pamahalaan upang gawing makabago ang mga pampublikong sasakyan para na rin sa kapakanan ng mga mananakay.

Ayon sa kalihim, ang mga bus na lagpas sa 15 taon ay hindi na papayagan pang magpa-rehistro sa LTO pagpasok ng 2014.

“Hindi na po sila ia-allow ng certificate of road worthiness. Binibigyan na lang po natin sila ng taon na ito ng phasing out period para pagpasok ng bagong taon ay talagang hindi na sila papayagang magrehistro uli sa LTO,” pahayag pa ni Ginez.

Magiging katuwang ng LTFRB ang Metropolitan Manila Development Authority (MMDA), Department of Transportation and Communication (DOTC) at Department of Public Works and Highways (DPWH) sa pagpapatupad ng nasabing proyekto simula ngayong Hulyo. (Bianca Mari Dava & Ruth Navales, UNTV News)

FILE PHOTO: Isang halimbawa ng pumapasadang UV Express may may kalumaan na. (RAYMOND BALA LACSA / Photoville International)

MANILA, Philippines – Tuloy na tuloy na ang pag-phaseout ng Land Transportation Franchising and Regulatory Board (LTFRB) sa mga lumang UV Express na may modelong 1999 pababa.

Ito’y matapos tanggihan ng Court of Appeals (CA) Fifth Division ang petisyon ng transport groups na pigilan ang pagpapatupad ng naturang kautusan.

Dismayado naman sa desisyon ng korte ang ilang transport group.

Ang ilan naman, bagama’t nakahandang tumugon sa kautusan, inerereklamo ang umano’y mabagal na desisyon ng LTFRB sa mga inihahaing application for extension ng mga AUV operator.

Ayon kay Ka Obet Martin, presidente ng Pasang Masda, hindi pa sila makapagpalit ng mga unit ng sasakyan dahil hinihintay pa nila ang sagot ng LTFRB.

“Yung mga nakapending dito sa LTFRB na nag-file ng petition for extension of validity na meron ng isang taon sa loob, hindi pa lumalabas ang desisyon. Gustuhin man ng operator na magpalit ng unit hindi makapagpalit dahil they have the expired decision inaantay na lang nila i-release ang bagong extension of validity.”

Ayon naman kay Sonia Del Mundo, ang tagapagsalita ng LTFRB, naantala umano ang desisyon dahil nagpalit ng pamunuan ang ahensiya at kailangan ring dumaan sa evaluation ang kanilang mga aplikasyon.

“Ang hinihiling natin is pang-unawa ng publiko that we are doing the best we can at the given circumstance na nagkaroon ng pagpapalit ng signing authorities.”

Enero ng taong kasalukuyan nang ipatupad ng LTFRB ang 13- year age limit sa mga UV Express vans at taxi cabs. (Ley Ann Lugod / Ruth Navales, UNTV News)

FILE PHOTO: Traffic build up approaching EDSA-Munoz, QC. (RAYMOND BALA LACSA / Photoville International)

MANILA, Philippines — Pinag-aaralan na ngayon ng Metro Manila Development Authority (MMDA) ang pagpapatupad ng reversible zipper lane o ‘yung mga linya kung saan maaaring mag-counter flow ang mga sasakyan sa ilang bahagi ng EDSA at C-5 road.

Layon nito na maibsan ang mabigat na daloy ng trapiko lalo na tuwing rush hour.

Ayon kay MMDA Chairman Francis Tolentino, plano itong ipatupad sa buwan ng Hulyo sa southbound lane ng Edsa mula ala-5 ng hapon hanggang alas-9 ng gabi para sa mga northbound na sasakyan.

Kapag umaga naman at masikip ang daloy ng mga sasakyan sa southbound lane, magbubukas ng isang linya sa northbound lane mula ala-6 hangang alas-9 ng umaga.

Ngunit hindi lahat ng sasakyan ay papayagang dumaan sa zipper lane, dahil tanging light vehicles at may mga sakay na tatlo pataas lamang ang maaaring gumamit nito.

Ilang U-turn slots din ang isasara upang maging tuluy-tuloy ang takbo ng mga sasakyan.

Maglalagay din ang MMDA ng karagdagang signages at traffic law enforcers para sa pagpapatupad ng nasabing sistema. (Robie Demelletes / Ruth Navales, UNTV News)

FILE PHOTO: Isang 10-wheel truck sa bahagi ng EDSA-Bagong Barrio sa Caloocan. Kapag napagtibay na ang truck ban, bawal na dumaan ang mga ito sa kahabaan ng EDSA sa araw maliban lamang ang mga biyahero ng mga perishable goods. (RAYMOND BALA LACSA / Photoville International)

MANILA, Philippines — Nakatakdang magpulong sa unang linggo ng Hulyo ang konseho ng 17 alkalde sa Metro Manila.

Pag-uusapan rito ang plano ng Metro Manila Development Authority (MMDA) na gawin nang permanente ang pagbabawal sa mga truck na dumaan sa EDSA tuwing umaga.

Ayon kay MMDA Chairman Francis Tolentino, ang mga truck sa Bonifacio Drive sa Port Area, Ayala Avenue sa Makati at Katipunan sa Quezon City ang isa sa mga dahilan ng traffic congestion tuwing rush hour.

Rekomendasyon ng MMDA na ipatupad ang “Manhattan truck route” kung saan bawal bumiyahe ang mga truck na galing port area tuwing umaga.

Nilinaw naman ni Tolentino na hindi kasama dito ang mga truck na may kargang mga perishable goods gaya ng gulay at mga prutas.

Inaasahan na sa darating na Hulyo ay magkakaroon na ng malinaw na paguusap hinggil sa plano ng ahensya. (Robie Demelletes / Ruth Navales, UNTV News)

Isang eroplano ng Philippine Airlines o PAL na papalapag sa Manila International Airport, Philippines, nitong ika-11 ng Hulyo. Tinanggal na ng European Union ang tatlong taon na ban sa Philippine flag carrier sa paglipad rehiyon ng Europa dahil sa ilang usaping pangkaligtasan. (PHOTOVILLE International)

MANILA, Philippines – Umaasa si Pangulong Benigno Aquino III na lalo pang sisigla ang turismo sa Pilipinas.

Ito ay kasunod ng pagkatangal ng European Union (EU) ng ban sa flag carrier ng bansa, ang Philippine Airlines (PAL).

Sinabi ng pangulo na malaking development sa aviation industry ang muling pagpayag ng EU na muling makapasok ang direct flights ng Pilipinas sa Europa at maging sa Amerika.

Pinuri rin ni Pangulong Aquino si Civil Aviation Authority of the Philippines (CAAP) Director General  Lt. General William Hotchkiss sa pagkakaalis ng ban sa Philippine Airlines. (UNTV News)

FILE PHOTO: Local tourists boarding a plane of Philippine Air Lines. (DOMINIC MEILY / Photoville International)

MANILA, Philippines — Hindi na hahanapan ng printed copy ng kanilang ticket ang mga pasahero sa mga airport sa kanilang paglabas o pagpasok sa bansa.

Ito ang ipinahayag  ng Department of Justice at Bureau of Immigration.

Inalis ng DOJ at BI ang requirement na magpakita ng printed copy ng ticket upang mas mapadali ang access sa mga serbisyo ng gobyerno.

Sa halip ay maaari na lamang gamitin at ipakita ang mga electronic tickets sa pamamagitan ng mobile devices gaya ng smart phone at tablet. (UNTV News)

FILE PHOTO: Ang ilan sa mga kabahayang nasunog bunga ng sagupaan ng pwersa ng gobyerno at ng Misuari-Led MNLF faction sa Zamboanga City. Sa kabila ng nito ayon sa Department of Tourism, hindi umano nito naapektuhan ang pangkalahatang kalagayan ng turismo sa bansa. (REUTERS / Erik Castro)

MANILA, Philippines – Walang malaking epekto sa turismo ng bansa ang mahigit sa dalawang linggo ng kaguluhan sa Zamboanga City.

Kilala ang Zamboanga bilang isang major tourism market na dinarayo ng maraming turista dahil sa magagandang tanawin.

Ayon kay Department of Tourism (DOT) Spokesman Asec. Benito Bengzon, mayroon pa ring steady growth sa Philippine tourism industry sa kabila ng mga pangyayari sa ilang bahagi ng Mindanao.

“What’s happening in Zamboanga is only in Zambonga, and does not represent the situation in the whole of the country,” pahayag ng kalihim.

Ayon sa DOT, bagama’t naparalisa ang turismo sa siyudad at kalapit na mga probinsya bunsod ng pagsasara ng Zamboanga International Airport at travel advisories ng maraming bansa, wala itong malaking epekto sa lumalagong industriya ng turismo ng Pilipinas.

Ayon kay Bengzon, “Flights were suspended for about a week, but if you look at the tourist arrivals as a whole, the growth is steady.”

Sa ngayon ay wala pang hawak na datus ng tourist arrival ang DOT para sa kasalukuyang buwan, ngunit tiwala ang ahensiya na hindi makakaepekto ang Zamboanga siege sa overall tourist arrival.

Samantala, inihayag ng DOT na may binabalangkas na silang rocovery plan para sa turismo sa Zamboanga.

Ayon kay Bengzon, kaagad na sisimulan ang naturang plano sa sandaling matapos na ang gulo sa siyudad. (Francis Rivera / Ruth Navales, UNTV News)

Ang sikat na Chocolate Hills ng Carmen, Bohol ay kasalukuyang nakasara dahil sa mga pinsalang tinamo mula sa  7.2 magnitude na lindol na tumama nitong Martes, October 15. Bukod sa nawasak na viewing deck na ito ay may mga burol mismo na nagkaroon ng malalaking hiwa. (JULIUS CASTROVERDE / PHOTOVILLE International)

MANILA, Philippines – Pinangangambahang malaki ang magiging epekto sa turismo ng pinsalang dulot ng malakas na lindol sa Cebu at Bohol.

Ayon kay Tourism Spokesperson Assistant Secretary Benito Bengzon, ipinag-utos na ni Department of Tourism (DOT) Secretary Mon Jimenez sa kanilang crisis management committee na planuhin ang alternative tour programs sa Cebu at Bohol.

Kasabay ito ng pagiisip ng mga paraan upang maibalik ang market confidence sa bansa.

Malaki naman ang nakikitang pag-asa ng kagawaran na makababangon agad ang industriya ng turismo sa dalawang pangunahing tourist destination sa bansa. (Francis Rivera / Ruth Navales, UNTV News)

FILE PHOTO: Whale shark or butanding at Donsol, Sorsogon (DAVID LOH / Reuters)

Sorsogon City, Philippines — Pinag-aaralan na ng mga opisyal ng Donsol, Sorsogon ang pagbabago sa buwan ng Butanding season bunsod ng maagang sightings ng mga ito sa lugar.

Ayon kay Donsol, Sorsogon Mayor Josephine Alcantara-Cruz, sa halip na January-May ay maaring gawing October-March ang Butanding season.

“The early sighting was actually noted last year also and this year actually this October this year we have already received reports that they have seen some Butandings in the area, and so some of our stakeholders specially the resort owners were requesting that maybe this is a high time for me, for us to start changing the Butanding season.”

Tuwing sumasapit ang Butanding season, dinarayo ang Donsol dahil sa mga nakikitang Butanding na kinagigiliwan ng maraming turista.

“Sobrang saya, masaya siya, kakaiba yung experience kasi ahh..malaki yung isda ,sobrang laki siya tapos nakakagulat dahil mabagal lang siya lumangoy tapos gentle lang siya so masaya,” pahayag ni  Rainier Rodil, local tourist.

Noong isang taon, nagkaroon ng agam-agam na nawawala na ang mga Butanding sa Donsol dahil wala nang makitang Butanding sa peak season nito.

Ayon kay Raul Burce ng World Wide Fund for Nature (WWF) Philippines, posibleng napaaga ang pagdating ng pagkaing whale sharks ng mga Butanding.

“Kung titingnan natin doon sa data namin possible na yung pag-aga din ng pagdating ng pagkain ng whale shark kaya napaaga din ang aggregation ng whale shark,” pahayag nito.

Ikinokonsidera na rin ngayon sa bayan ng Donsol na i-anunsyo ang pagbabago ng panahon ng Butanding para maabisuhan ang mga turista na nais makakita ng higanteng isda.

Ani Burce, “Dapat mas maaga sanang pumunta yung mga turista. Around like for example sana January and February, yan ang magandang timing para sa pagbubutanding dito sa Donsol.” (Rhea Combo / Ruth Navales, UNTV News)

FILE PHOTO: Ang ilan sa mga float na sumali sa Panagbenga Festival 2013. (JUN RAPANAN / Photoville International)

BAGUIO CITY, Philippines — Opisyal nang pinasimulan nitong umaga ng Sabado ang taunang selebrasyon ng Baguio Flower Festival o mas kilala sa tawag na Panagbenga (Panahon ng Pamumulaklak).

Naging makulay at engrande ang pagbubukas ng Panagbenga Festival sa pamamagitan ng flower mardi gras at street dancing na sinaksihan ng libu-libong local at foreign tourists.

“Oh it’s nice since it started. I’m here every year and I love the colors and they make out of this beautiful colorful uniform out of nothing. I really love it and the smile everybody has especially the children,” pahayag ni Bruno Salera na isang Swiss tourist.

Sa pagtaya ng Baguio City Tourism Office, posibleng umabot ng hanggang dalawang milyon ang bilang ng mga turistang magpupunta sa lungsod para makisaya sa month-long celebration ng Panagbenga Festival.

Sa ngayon ay mas madali na ang biyahe patungong Baguio dahil sa binuksang Tarlac, Pangasinan, La Union Expressway (TPLEX).

Pinapayuhan naman ang mga turista na aakyat sa Baguio na magpa-reserve na sa mga hotel bago umalis dahil punuan na ang ilang mga bahay-bakasyunan sa siyudad.

Batay sa programa ng Tourism Office, iba’t ibang aktibidad ang aasahan sa isang-buwang pagdiriwang ng flower festival kabilang dito ang PMA Alumni Homecoming (Feb.15), Session Road in Bloom (Feb. 24-March 2), Handog ng Panagbenga sa Pamilyang Baguio (Feb. 16), Let the Thousand Flowers Bloom, Session Roard in Bloom, Pony Boys’ Day, Grand Street Parade at ang pinakaaabangang Grand Float Parade sa February 23.

“Well we take these opportunities in behalf of the city government to invite all of you brothers and sisters from other provinces municipalities and cities all over the Philippines to come and join us in the city of Baguio and Cordillera Province to join us in the celebration of Panagbenga 2014,” pahayag ni aguio City Mayor Mauricio Domogan. (Bryan Lacanlale / Ruth Navales, UNTV News)

Ang bagong zipbike sa Chocolate Hills Adventure Park sa Bohol na siyang patok sa mga turistang dumadayo rito (UNTV News)

BOHOL, Philippines – Patok na patok ngayon sa mga turista ang kakaibang zipline at iba’t-ibang hanging bridge challenges sa Chocolates Hills Adventure Park sa bayan ng Carmen sa lalawigan ng Bohol.

Kakaiba ang naturang zipline dahil imbes na nakaupo o nakahiga, kailangan mong sumakay ng bisikleta.

Ang tawag dito ay zipbike (zipline + bike).

Tinatayang mahigit kalahating kilometro ang layo ng zipbike sa dulo nito.

Bukod sa zipbike, patok din dito ang ibat-ibang klase ng hanging bridge adventure.

“We have zipline in the province so we would like to innovate so when they come there is a new thing to do,” pahayag ni Jing Velascou, may-ari ng Chocolates Hills Adventure Park. (Bryan Evangelista / Ruth Navales, UNTV News)

Ang Daniel Z. Romualdez Airport sa Tacloban City na balik operational na matapos ang isang emergency repair. (UNTV News)

TACLOBAN CITY, Philippines – Balik na sa normal nitong Huwebes ang operasyon ng Daniel Z. Romualdez Airport sa Tacloban City matapos na pansamantalang isara noong Miyerkules.

Isa ang paliparan sa malubhang napinsala ng storm surge na idinulot ng Bagyong Yolanda nitong nakaraang taon.

Dalawampu’t apat na oras na ipinatigil ng Civil Aviation Authority (CAAP) upang mabigyang daan ang pagsesemento sa mga pothole sa runway ng paliparan.

Ayon kay Efren Nagrama, Area 8 Manager ng CAAP, matagal nang nagsasagawa ng mga repair sa runway tuwing gabi, ngunit dahil lalong lumalaki ang mga pothole habang tumatagal dahil sa mga pag ulan ay nagdesisyon na ang CAAP na isara ito para sa emergency repair.

“Sinusubukan talaga namin na walang disruption sa operation natin that is why every night nagre-repair kami before pa itong closure minsan lang na iinterupt kami because of weather condition di naman didikit yong aspalto pag mabasa sya pero sa dami nga rin ng tama kayo sa dami ng complainant na piloto na unsafe na abruptly, we decided na mas pahalagahan natin yong safety kaysa naman ituloy-tuloy natin yong operation may madisgrasya pa.”

Sa ngayon ay balik normal na ang 12 biyahe ng Airphil Express, Air Asia Zest, Tiger Airways at Cebu Pacific papasok at palabas ng Tacloban.

Humingi naman ng paumanhin sa mga pasahero ang pamunuan ng CAAP sa nangyaring pagkaantala ng mga flight.

“Una-una gusto nating humingi ng paumanhin doon sa naapektuhan nitong cancellation nation but then again inuulit-ulit natin na walng delay dapat ang pagde-decide kung safety o buhay ng tao ang nakataya. Gagawin namin ang lahat ng paraan na hindi na ito maulit kahit sa maliit na oras lang ng pagko-close natin,” dagdag ni Nagrama. (Jenelyn Gaquit / Ruth Navales, UNTV News)

Philippine Airline (UNTV News)

MANILA, Philippines — Simula sa susunod na linggo, limang malalaking airline carrier ang ililipat sa Ninoy Aquino International Airport (NAIA) Terminal 3.

Ito ay upang ma-decongest ang NAIA Terminal 1 na sa ngayon ay sumasailalim sa rehabilitasyon.

“Alam naman natin 30 year old, masikip na ang Terminal 1. Sobra-sobra ang hina-handle so marapat lang na ilipat ang kalahati nito sa Terminal 3 para lumuwang ang Terminal 1 habang nag-rehabilitate tayo
ng Terminal 1,” pahayag ni DOTC Secretary Jun Abaya.

Kasama sa mga ililipat ay ang Delta Airlines na magsisimula na ng kanilang operasyon sa Lunes, habang ang Emirate Airlines, Singapore Airlines, Cathay at Klm Airlines ay sa unang linggo ng Agosto pa ililipat.

Malapit ng matapos ang mga lounge ng mga airline carrier, at puspusan na rin ang pagsasaayos sa mga opisina nito.

Minarapat ng DOTC na kumpletuhin muna ang konstruksyon ng mga lounge at ibang pasilidad sa Terminal 3 bago pahintulutang makalipat ang mga airline carrier.

Kapag nailipat na ang limang pinakamalalakinga airline carrier sa Terminal 3, makatutulong ito upang mas mapaganda ang operasyon ng Terminal 1 at maaaring masundan pa ito.

“Yung paglipat dito muna initially ng limang airline ay talagang titingnan natin kung were still can handle additional flights,” pahayag ni NAIA Terminal 3 General Manager Engr. Octavio Lina.

Ayon sa DOTC, lampas na sa carrying capacity na 4.5 million ang NAIA Terminal 1 na sa ngayon ay umaabot na sa walong milyong pasahero kada taon.

Plano rin ng DOTC na makapaglagay ng mga low cost airline terminal sa tabi ng NAIA 1 at 2 upang mapalaki pa lalo ang kapasidad ng mga airport.

Kaugnay nito ay puspusan na din ang pagtatayo ng mga provincial airport sa iba’t ibang panig ng bansa maging ang planong pagtatayo ng airport sa Clark, Pampanga at Sangley Point sa Cavite.

Samantala, inirerkomenda ni Sec. Jun Abaya kay Pangulong Aquino na maiulat sa SONA nito sa susunod na linggo ang mga matagumpay na proyektong nagawa ng kagawaran. (Mon Jocson / Ruth Navales, UNTV News)

Gumagawa ng artificial coral reefs ang Pacific Cebu Resort sa Cebu bilang pamalit sa mga napinsala ng dynamite fishing (UNTV News)

CEBU, Philippines — Nakapaloob ang ating bansa sa tinatawag na coral triangle, tahanan ng may ¾ ng world coral species at mahigit dalawang libong marine plants at animals.

Sa aming pagbisita sa Pacific Cebu Resort, hangad nila hindi lamang kumita kundi ipagmalasakit din ang ibinibigay na pagpapala ng kanilang yamang dagat na nasasakupan.

Gumagawa din sila dito ng mga hakbang upang maparami ang mga isda, kung saan naglagay sila rito ng mga banga, ngayon tinutubuan ng mga corals na nagiging tirahan ng mga isda.

“Kasi itong mga banga na ito, nakita natin may dalawang buwan na may tumutubo ng real corals talaga at madami ng isda nag-stay sa banga na iyon,” pahayag ni Joselito Gilig, isang diver sa Pacific Cebu Resort.

Nasira kasi ang ilang coral reefs dahil sa mga dynamite fishing noon, kaya ngayon sa tulong ng dalawampu’t limang banga na kanilang inilagay, kapansin-pansin din ang muling pagdami ng mga isda.

Kaya hikayat nilang subukan din nating mga Pilipino mag-dive sa ating mga marine sanctuary upang mapahalagahan natin ang mga diving site na kinahihiligan ng mga dayuhan.

“Yung dive shop natin ay 5-star PADI (Professional Association of Diving Instructors) accredited, kaya we offer different courses in diving and fun dive,” ani Franco Detosil ng Pacific Cebu Resort.

Diving man o snorkeling ang inyong trip dito sa Mactan, Cebu, may paalala sila para sa ating mga kasambahay upang huwag magtapon ng basura lalo gawa sa plastic.

“Karamihan makita naming mga basura ay mga diapers, cans, bottled water, hindi maganda ‘yan sa mga marine life natin, makamamatay din,” saad ni Gilig. (Bryan Evangelista, UNTV News)

Inaasahang bibilis na ang biyahe patungong Cagayan Province sa pagbubukas ng Ninoy Aquino bridge (UNTV News)

TUGUEGARAO CITY, Philippines — Pinangunahan ni Pangulong Benigno Aquino III ang pagbubukas ng Ninoy Aquino bridge sa Tuao, Cagayan Province bilang bahagi na rin ng paggunita sa kamatayan kanyang ama at dating senador Ninoy Aquino.

Nagkakahalaga ang proyekto ng halos anim na raang milyong piso.

Dahil sa tulay at proposed connecting road network, maidudugtong nito ang Cordillera Administrative Region (CAR), Ilocos region at Cagayan.

Sa pagbubukas ng panibagong ruta na ito, inaasahang makakatulong ng malaki ito sa turismo at kalakalan sa Cordillera at Cagayan region.

“Dati raw po, inaabot ng hanggang limang oras kung maglalakbay mula Tuao patungong Cabugao sa Apayao, ngayon humigit kumulang, dalawang oras at kalahati nalang ang biyahe,” saad ng pangulo.

Kasabay ng pagbubukas ng Ninoy Aquino bridge, nagpaalala naman ang pangulo sa mga pulitiko na unahin muna ang pagtatrabaho at iwasan muna ang maagang pangangampanya at pamumulitika.

“Mga kasama, kapag nagbabasa tayo ng dyaryo araw araw tila marami nang nangangampanya, parang nakalimutan nila may problema tayo ngayon, mayroon namang problema sa 2016, 2016 na yun. Ngayon tugunan muna natin yung problemang bumabalot sa atin pong sambayanan dahil obligasyon natin maski sa ano tayong panig kung tayo ay may magagawa sa kapwa di pwede somewhere down the line.”

Nagpahayag naman ng pagsuporta ang mga opisyal ng Apayao at Cagayan province sa mga reporma ng administrasyong Aquino sa kabila ng mga kritisismong ibinabato sa administrasyon at isa na rito ang isyu sa Disbursement Acceleration Program (DAP). (Nel Maribojoc, UNTV News)