FILE PHOTO: Mass Rail Transit (PHOTOVILLE International)

MANILA, Philippines – Nag-abiso na ang pamunuan ng Metro Rail Transit (MRT) na suspendido ang  mga biyahe sa darating na long holiday.

Ayon sa pamunuan ng MRT, sasamantalahin nila ang mahabang bakasyon para linisin at kumpunihin ang depektibong pasilidad ng MRT.

Simula sa Huwebes (Marso 28) hanggang Linggo (Marso 31), kanselado ang lahat ng biyahe ng tren ng MRT.

Nauna nang ipinahayag ng LRTA na wala rin itong biyahe sa darating na long holiday.

Balik-operasyon naman ang MRT at LRT sa Abril 1 (Lunes). (Ley Ann Lugod & Ruth Navales, UNTV News)

FILE PHOTO: Ang Boracay ang isa sa mga paboritong puntahan ng mga turistang lokal man o foreigners lalo na ngayong summer vacation. (Romeo Daquioag / UNTV)

MANILA, Philippines — Isa sa mga lugar na tututukan ng PNP Anti-Illegal Drug Special Operations Task Force (AIDSOTF) ang mga tourist destination sa bansa na potensiyal na pagbentahan ng droga.

Ayon kay AIDSOTF Spokesman Chief Inspector Roque Merdegia, maaring samantalahin ng mga drug pusher ang pagdagsa ng mga turista sa mga lugar-bakasyunan.

Isa ang Boracay sa tourist spots na imo-monitor ng ahensiya.

Nangunguna ang shabu sa pinakamabiling droga sumunod ang marijuana at cocaine.

Ayon sa AIDSOTF, pumapalo sa P5,000 hanggang P9,000 ang street value ng isang gramo ng shabu.

Lumalabas na aabot na sa lima hanggang siyam na milyong piso ang kada kilo ng shabu.

Ayon pa sa ahensya, lumalabas na nasa 1.6 hanggang 1.7 million ang gumagamit ng droga sa buong bansa.

Sa ngayon ay tuloy ang  kampanya ng mga otoridad upang masugpo ang iligal na bentahan ng droga sa  mga  barangay at  sa mga pinaghihinalaang shabu laboratories sa bansa. (Victor Cosare & Ruth Navales, UNTV News)

FILE PHOTO: Ang pagdagsa ng mga motoristang biyabiyahe patungong Northern Luzon sa NLEX. (PHOTOVILLE International)

MANILA, Philippines — Ilulunsad na ng Department of Public Works and Highways (DPWH) ang kanilang Oplan Lakbay Alalay program sa araw ng Linggo, Marso 24.

Layon ng programang ito na magbigay ayuda sa mga motorista sa darating na long holiday.

Ayon sa DPWH, inatasan na nito ang kanilang mga tauhan sa buong bansa na maglagay ng District Motorist Assistance Team sa mga strategic location sa kahabaan ng mga national highway lalo na sa probinsya.

Inatasan din DPWH ang mga contractor na may on-going project na maglagay ng information at warning signages at traffic advisory para sa mga alternatibong ruta nang maiwasan ang kalituhan at pagkakabuhol-buhol ng mga sasakyan.

Tatagal ang Lakbay Alalay program hanggang sa Abril 1. (UNTV News)

FILE PHOTO: Isang bus na bumabagtas sa kahabaan ng NLEX o North Luzon Expressway (PHOTOVILLE International)

MANILA, Philippines – Hindi na tatanggap ang Land Transportation and Franchising Regulatory Board (LTFRB) ng aplikasyon para sa special permit ng mga bus na bibiyahe sa mga probinsya ngayong long holiday.

Ayon sa LTFRB, natapos na noong Marso 15 ang deadline ng aplikasyon para sa special permit.

Umabot sa 732 na mga bus ang nag-apply sa special permit kung saan mahigit na sa 200 ang nakatakdang bigyan ng permiso, habang kasalukuyan pa nilang pinag-aaralan ang iba.

Epektibo ang nasabing permit sa Marso 23 hanggang Abril 1kung kailan inaasahan ang pagdagsa ng mga pasahero. (UNTV News)

FILE PHOTO: Ang pila ng mga sasakyang magbabayad ng toll fee sa kanilang paggamit ng North Luzon Expressway o NLEX. (PHOTOVILLE International)

MANILA, Philippines – Magdaragdag ng toll personnel ang Manila North Tollways Corporation upang asistehan ang mga motoristang dadaan sa NLEX (North Luzon Expressway), SCTEX (Subic-Clark-Tarlac Expressway) at CAVITEX (Manila-Cavite Expressway) sa long weekend.

Sa NLEX, maglalagay ng karagdagang toll teller sa Balintawak, Mindanao Avenue, Bocaue at Dau toll plazas.

Sa SCTEX naman ay magdaragdag din ng teller sa Mabalacat, San Miguel, Tarlac at Tipo.

Karagdagang toll collectors, security personnel, traffic officers and marshals naman ang ide-deploy sa CAVITEX.

“MNTC in cooperation with TRB will implement “Safe Trip Mo Sagot Ko” our motorist assistance program; aims to intensify of increase our services in 3 expressways by providing additional teams and manpower to enhance our services,” pahayag ni MNTC Vice President Raul Ignacio.

Inaasahan na tataas ng 15 hanggang 20-porsiyento ang volume ng mga sasakyan mula Marso 27 hanggang Marso 31.

Inaasahang aabot ng 200-libong motorista ang dadaan sa NLEX, habang 35-libo sa SCTEX at 90-libo naman sa CAVITEX.

24 oras na naka-stand by ang emergency response team at mechanical support sa tatlong highway.

Magbibigay din ng libreng tawag, libreng wifi access at libreng inuming tubig ang Tollways Management Corporation sa mga selected toll facility.

Libre rin ang towing services ng NLEX at SCTEX para sa mga class one vehicle.

Tiniyak naman ng pamunuan ng NLEX na wala muna silang isasarang kalsada at wala ring road repair mula Marso 23 hanggang Abril 2.

Pinapayuhan naman ang mga motorista na gumamit na lamang ng electronic tag upang hindi maabala sa mahabang pila ng mga sasakyan.

Para sa karagdagang impormasyon, maaaring makipag-ugnayan sa opisina ng NLEX at SCTEX sa numerong (02) 3-5000. (Grace Casin & Ruth Navales, UNTV News)

FILE PHOTO: NLEX or North Luzon Expressway northbound (PHOTOVILLE International)

BULACAN, Philippines – Tatlong araw bago sumapit ang holy week, maluwag pa rin ang daloy ng trapiko sa kahabaan ng North Luzon Expressway (NLEX).

Batay sa NLEX Traffic Monitoring Center, lite to moderate pa rin ang daloy ng mga sasakyan mula Balintawak exit, Bocaue toll plaza at hangang sa Dau toll plaza.

Maalwan pang makakauwi ang mga bibiyahe ng maaga papunta sa mga probinsya sa North Luzon.

Sa pagtaya ng NLEX authorities, Miyerkules pa ng hapon magsisimulang bumigat ang daloy ng trapiko dito.

Tinatayang aabot sa 200-libong mga sasakyan ang dadaan sa NLEX ngayong holy week kumpara sa 160-libong sasakyan noong nakaraang taon.

Sa mga nagnanais malaman ang lagay ng trapiko, bisitahin lamang ang www.tolways.net.ph. (Nestor Torres & Ruth Navales, UNTV News)

Ang ilan sa mga kawani ng PNP na nakatalaga sa isang bus terminal upang masiguro ang kaayusan at kapayapaan sa pagdagsa ng mga kababayan nating luluwas ngayong long weekend. (UNTV News)

QUEZON CITY, Philippines – Ipinakalat na ng pamunuan ng Quezon City Police District (QCPD) ang 500 pulis upang magbantay sa iba’t ibang lugar sa lungsod ngayong holiday break.

Ayon kay QCPD Dir. Senior Supt. Richard Albano, ipinag-utos na niya na higpitan ang seguridad sa mga bus terminal upang hindi makapambiktima ang mga magnanakaw at mandurukot.

Nagpakalat din ng mga pulis sa mga simbahan, mga mall at maging sa mga istasyon ng Metro Rail Transit (MRT) at Light Rail Transit (LRT).

Inatasan din ni Albano ang lahat ng police station sa lungsod na paigtingin ang pagbabantay sa mga residential area laban sa mga akyat-bahay.

“Mayroon tayong mga bus marshals, plain clothes na detective beat at meron ding bantay-bahay,” pahayag ng opisyal.

Ipinaalala naman ng pamunuan ng QCPD na ipinagbabawal sa kanilang mga tauhan ang magbakasyon ngayong long weekend upang tiyakin ang seguridad at kaligtasan ng publiko. (Lea Ylagan & Ruth Navales, UNTV News)

FILE PHOTO: Ang ilan sa mga dako sa South Luzon Expressway na minu-monitor ng mga kawani ng SLEX sa pamamagitan ng mga CCTV cameras. (UNTV News)

MANILA, Philippines – Nag-umpisa nang maghanda ang pamunuan ng South Luzon Expressway (SLEX) para sa “Oplan Ligtas Biyahe” ng Department of Transportation and Communications (DOTC) para sa mahabang bakasyon.

Nasa 210-libong mga sasakyan ang regular na dumadaan sa kahabaan ng SLEX araw-araw, ngunit sa darating na Miyerkules ay inaasahang aabot sa 250-libong mga sasakyan ang dadaan dito.

Dahil dito, magdaragdag ng mga ambulant teller ang Manila Toll Expressway System (MATES) sa Sto. Tomas, Batangas, Sta. Rosa at Calamba toll plazas.

Nanawagan naman ang pamunuan ng SLEX sa mga motorista na bumiyahe nang maaga at huwag sumabay sa rush hour upang makaiwas sa pagdagsa ng mga sasakyan sa Miyerkules.

“Please don’t beat the rush hour laging hilig nating ganun eh beating the rush hour, you can plan you could monitor also situation natin sa SLEX so that you could form comfortable travel,” pahayag ni Col. Inosencio Silbol, Operation Manager ng MATES.

Paalala pa sa mga motorista, laging tiyaking nasa maayos na kondisyon ang mga sasakyan at huwag magmamaneho ng nakainom ng alak o kaya naman ay inaantok upang makaiwas sa aberya at disgrasya. (Sherwin Culubong & Ruth Navales, UNTV News)

Google Map: Kalibo International Airport

AKLAN, Philippines – Minamadali na ng Kalibo International Airport ang konstruksyon ng karagdagang pasilidad sa paliparan dahil sa inaasahang pagdagsa ng mga turista ngayong summer.

Bukod sa pinagandang departure at arrival area, naglagay na rin ng breast feeding station, diaper changing area at playroom para sa mga bata.

Ayon sa airport manager na si Engr. Percy Malonesio, bahagi ito ng mga hakbangin ng Civil Aviation Authority of the Philippines (CAAP) upang maiangat ang antas ng serbisyo ng mga paliparan sa bansa.

Isa rin sa pinakabagong kagamitan ng paliparan ay ang fire truck mula pa sa Europa na nagkakahalaga ng P58 million. (Sharmaine Domingo & Ruth Navales, UNTV News)

FILE PHOTO: NAIA Terminal 3 entrance (PHOTOVILLE International)

MANILA, Philippines – Mas hinigpitan na ang seguridad sa Ninoy Aquino International Airport (NAIA) dahil sa patuloy na pagdagsa ng mga pasahero.

Ayon sa pamunuan ng NAIA Terminal 3, sa mga ganitong panahon, halos umaabot sa apatnapung libong pasahero ang dumadagsa sa paliparan kada araw.

Ang bawat pumapasok ay dumadaan sa X-Ray machine, maging ang kanilang mga bagahe ay masusing iniinspeksyon.

Sa ngayon ay wala pa namang naitatalang major flight cancellation, at kung magkakaroon man ng delay ay nabibigyan naman ng ayuda ang mga pasahero sa ilalim ng Passengers’ Bill of Rights.

Paalala naman ng mga airline company sa mga pasahero na dumating nang mas maaga bago ang oras ng flight upang huwag maiwan ng eroplano. (UNTV News)

Ang homepage ng www.scubadiving.com

MANILA, Philippines – Nahirang ng isang scuba diving magazine bilang “Best Destination for Diving in the Pacific and Indian Ocean Regions” ang mga dive spots sa Pilipinas.

Ito ay batay sa ginawang online poll ng babasahin na ipinost sa kanlang website na www.scubadiving.com.

Ayon kay Karen Chan, ang Executive Director ng Philippine Commission on Sports Scuba Diving, talagang hinahanap sa ibang bansa ang mga dive site dito sa Pilipinas.

Batay sa PCSSD-DOT, ang diving ay isa sa mga top tourist activities sa bansa.

Tinatayang mayroong 500-dive spots ang Pilipinas kung saan marami dito ay unexplored o hindi pa natutuklasan.

Kaugnay nito ipinasya ng Department of Tourism na magdaos ng kauna-unahang dive expo dito sa bansa.

Inaasahan na sa pamamagitan nito ay mas makikilala ang Pilipinas bilang isa sa magandang diving sites sa buong mundo.

Ang World DEEP o “Dive Expo and Exhibition Philippines” ay gaganapin sa Mactan, Cebu simula sa Abril 18 hanggang Abril 21. (Francis Rivera & Ruth Navales, UNTV News)

PNP Spokesperson Chief Supt. Generoso Cerbo Jr. (UNTV News)

MANILA, Philippines – Handang magdagdag ang Philippine National Police ng mga tauhan upang masiguro ang kaligtasan ng mga turista sa bansa.

Ayon kay PNP Spokesperson Chief Supt. Generoso Cerbo Jr., mahalagang mapanatili ang kapayapaan at kaayusan sa mga lugar na dinarayo ng maraming turista dahil malaki ang ambag nito sa ekonomiya ng bansa.

“Kinikilala naman ng PNP ang ating tourism bilang isang major industry, kaya ginagawa ng PNP diyan bukod sa mandate na mag-protect, binibigyan din natin ng atensyon ang ating mga tourist destination.”

Idinagdag pa ng heneral na ang bawat tourist police unit ay pamumunuan ng isang police chief inspector na may tungkuling magbantay sa seguridad ng mga turista at kapaligiran.

May mandato rin itong manghuli ng mga lumalabag sa batas at mag-imbestiga ng mga kasong mangyayari sa lugar.

“Sila’y umaakto bilang isang police assistance center although ang kanyang specialization ay sa isang tourist destination. So meron itong specialized training kung paano makikihalubilo at makikipag-usap at kung paano ia-address yung mga problema na pwedeng ma-encounter ng mga turista.”

Sa kasalukuyan ay mayroon ng 1,395 tourist police ang nakatalaga sa iba’t ibang pasyalan sa bansa kabilang dito ang Ilocos Norte, Laguna, Palawan, Oriental Mindoro, Camarines Sur, Aklan, Cebu, Camiguin, Davao, Baguio, at Metro Manila. (Lea Ylagan & Ruth Navales, UNTV News)

FILE PHOTO: Traffic at EDSA-Muñoz, Quezon City (UNTV News)

MANILA, Philippines – Suspendido ang number coding scheme sa buong Metro Manila bukas (Martes), Abril 9.

Batay sa anunsyo ng Metropolitan Manila Development Authority (MMDA), lifted ang number coding mula ala-7 ng umaga hanggang ala-7 ng gabi.

Regular holiday bukas dahil sa Araw ng Kagitingan bilang pag-alala sa kabayanihan ng mga beteranong sundalo sa World War II.

Paalala rin sa mga beterano, may libreng sakay kayo sa MRT at LRT hanggang sa araw ng Huwebes, Abril 11, bilang pakikiisa sa paggunita sa Araw ng Kagitingan. (UNTV News)

Ang pamosong mangga ng Guimaras na tampok sa Manggahan Festival 2013. (UNTV News)

GUIMARAS, Philippines – Sari-saring programa at produkto ang tampok sa binuksang Manggahan Festival 2013 na sinimulan nitong Lunes, Abril 8.

Bida sa programa ang masarap, matamis at ipinagmamalaking mangga ng Guimaras kasama ang iba’t ibang produkto ng isla gaya dried mango at mango catsup.

Layon ng pagdaraos ng programa na hikayatin ang mga turista na bisitahin ang isla at palakasin ang industriya ng mangga na pangunahing produkto at pinagkukunan ng ikabubuhay ng mga tao sa probinsya ng Guimaras.

Kinikilala sa buong mundo ang mangga ng Guimaras dahil sa dekalidad nitong sarap at tamis.

Bukod sa samu’t-saring produkto, atraksyon din sa pagdiriwang ang Cultural Show, Mango Man Triathlon, Fun Run, Agri-Trade Fair, Food Festival, search for the Mutya ng Guimaras 2013, at ang pinakaaabangan “Guimaras Mango eat-all-you-can”.

Umaasa ang lokal na pamahalaan na sa pamamagitan ng Manggahan Festival ay dadayuhin rin ng mga turista ang iba pang magagandang lugar sa Western Visayas Region. (Earl Camilo & Ruth Navales, UNTV News)

Ang isa sa mga lechon na ipinarada sa Panaad Festival. (UNTV News)

NEGROS OCCIDENTAL, Philippines — Tinatayang nasa 50 lechon ang ipinarada sa pagbubukas ng 20th Panaad Festival sa Negros Occidental kahapon, araw ng Martes.

Tinatawag rin nila itong “Lechonaad” o “Lechon sa Panaad,” dahil ang lechon ay parte na ng kulturang Pinoy.

Ayon kay Negros Occidental Governor Alfredo Marañon Jr., layon ng pagdiriwang na suportahan at palakasin ang livestock industry sa lalawigan.

“The livestock industry in the Philippines is second to rice industry. The livestock industry in the country is bigger than the sugar industry; it is the matter of support.”

Kasabay ng pagdiriwang, ipinagkaloob rin kahapon ng pamahalaang panlalawigan ng Negros ang P1.1 million insurance para sa mga hog raiser.

Bukod sa parada ng mga lechon, tampok rin sa pagdiriwang ang pagpapakita ng mga Negrense ng kani-kaniyang kasaysayan, sining at kultura, turismo, komersyo, kalakalan at ibat ibang industriya sa lalawigan.

Libu-libong turista naman ang nakiisa at nakisaya sa Panaad Festival. (Primrose Guilaran & Ruth Navales, UNTV News)

FILE PHOTO: Isang taxi at jeepney na pumapasada (PHOTOVILLE International)

MANILA, Philippines – Isusulong ng National Council for Commuters Safety and Protection (NCCSP) ang rollback sa pasahe sa mga jeep, bus at taxi.

Sa pagtaya ng grupo, halos 10 piso na kada litro ang ibinaba sa presyo ng petrolyo mula noong nakaraang taon.

Sa panukala ng consumer group, nais nilang bumaba ng 50-sentimos ang minimum na pasahe sa jeep, habang piso naman ang ihihirit nilang rollback sa pasahe sa bus para bumaba sa P9 ang pasahe sa ordinary buses, habang P11 sa air-conditioned.

Hihilingin naman nilang gawing P35 ang flag down rate sa taxi partikular sa Metro Manila.

Isusulong din ng consumer group ang pag-rebisa sa pasahe sa mga AUV tulad ng mga FX.

Posibleng ihain ng grupo ang kanilang petisyon sa Land Transportation Franchising and Regulatory Board (LTFRB) sa linggong ito. (UNTV News)

FILE PHOTO: Isang motorista na may angkas na bata na walang helmet. Ayon sa DOH, karamihan sa mga namamatay sa aksidente sa motorsiklo ay mga hindi nakasuot o walang helmet. (Raymond Bala Lacsa / PHOTOVILLE International)

MANILA, Philippines – Siyam sa sampung motorcycle riders ang namamatay dahil walang suot na helmet.

Batay sa Online National Electronic Injury Surveillance System (ONEISS) ng Department of Health (DOH), karamihan sa mga namamatay sa aksidente sa motorsiklo ay mga hindi nakasuot o walang helmet.

Ang naturang ulat ay bahagi ng mahigit sa 13-libong kaso ng mga nasaktan o napinsala sanhi ng disgrasya sa motorsiklo sa huling bahagi ng 2012 na kinalap ng DOH.

Inirekomenda naman ng DOH ang “safety first mindset attitude” para sa mga nagmamaneho ng motorsiklo na responsibilidad ng bawat indibidwal at ng lahat ng mga gumagamit ng kalsada. (UNTV News)

FILE PHOTO: SCTEX. The Tipo Exit Toll Plaza in Hermosa, Bataan. (HANDTELL / Wikipedia)

MANILA, Philippines – Nagsumite na ng petisyon sa Toll Regulatory Board (TRB) ang pamunuan ng Subic-Clark-Tarlac- Expressway (SCTEX) para sa hirit na dagdag singil.

Nais ng operator nitong Bases Conversion and Development Authority (BCDA) na magpatupad ng higit 40-porsyentong increase sa kasalukuyang bayad sa toll.

Halos siyam na piso (P8.56/km) ang dagdag sa Class 1; pitong piso (P7.64/km) naman sa Class 2 habang P12.84/km sa Class 3.

Kung maaaprubahan ang petisyon, magiging P51 hanggang P388 na ang toll sa Class 1; P102 – P777 sa Class 2, habang aabot naman sa P153 – P1,165 ang babayarang toll sa Class 3.

Ayon sa SCTEX operator, kailangan na nilang magtaas ng singil upang mabayaran ang Japan International Cooperating Agency (JICA) na siyang nag-pondo sa halos 80-porsyento ng proyekto.

Ang SCTEX ay binuksan noong 2008 at huling nagpatupad ng toll hike noong 2011. (UNTV News)

Google Maps: Taiwan – Philippines

MANILA, Philippines — Kinansela na ng maraming Taiwanese travel agency ang tour packages sa Pilipinas.

Ito’y kasunod pa rin ng pagsiklab ng tensyon sa pagitan ng Taiwan at Pilipinas dahil sa pagkamatay ng isang Taiwanese fisherman bunsod ng umano’y pamamaril ng Philippine Coast Guard (PCG) sa Batanes.

Ayon sa Department of Tourism (DOT), nagpatupad ng patakaran ang Taiwanese government kung saan maaaring maparusahan ang mga travel agency na mag-aalok ng tour packages sa Pilipinas.

Halos sampung libong turista ang katumbas ng mga kanseladong group packages at kung magpapatuloy ito sa loob ng anim na buwan ay posibleng umabot sa 50-libong Taiwanese tourists ang mawawala sa Pilipinas.

Dahil naman sa pagbaba ng bilang ng turistang Taiwanese, naghahanap na ng alternative market ang DOT at kabilang dito ang China. (UNTV News)

FILE PHOTO: Ninoy Aquino International Airport (RYAN MENDOZA / Photoville International)

MANILA, Philippines — Pinag-aaralan na ng Department of Transportation and Communications (DOTC) ang paglipat ng Ninoy Aquino International Airport (NAIA) sa Clark, Pampanga.

Ito’y kasunod ng pangamba ng airline operators sa disgrasyang posibleng idulot ng mga nagbabagsakang kisame sa NAIA Terminal 1.

Ayon kay DOTC Secretary Jun Abaya, naiparating na niya kay Pangulong Benigno Aquino III ang isyu at sisimulan na ang pag-aayos sa nasabing terminal.

Bukod pa ito sa mga aayusing linya ng tubig at kuryente at rehabilitasyon sa bahagi ng NAIA Terminal 3.

Plano rin ng DOTC na ilipat ang terminal ng mga maliliit na eroplano sa Sangley Point sa Cavite habang sa Cagayan De Oro naman planong ilipat ang Philippine Air Force (PAF).

Bukod dito ay plano na ring gawing international airport ang walong paliparan sa ilang probinsya.

Wala pang itinakdang petsa kung kailan ito matatapos bagamat tiniyak ng DOTC na minamadali na ang naturang mga proyekto. (UNTV News)